I Rumenzulaghji
U me locu affiziunatu,
si chjama Corsica tant'amata
Tarra di u mè passatu,
vogliu cantà a to distinata ;

A muntagna maestuosa,
diventa scogliu d'argentu,
Pà a cummuna primurosa
di prununcià a to sintenza.

Parùdda scritta, sumenta racòlta,
Pà l'eletti cumprati, da l'imperiu capitali.

Svanisci u mè pinseru, di a tarra disvistàta,
U rumenzu di l'orgogliu, impia bè u portafogliu.
A tarra sola ùn si po difenda,
contr'à l'alienaziòni materiali
Pruclamata cundannata, da u statu capitali.

E u populu casca, è u populu cànta,
A sorti maladetta di a tarra benedetta !

E si pregha, è si pregha, cù u novu cumitatu,
Luttendu, sempri si spera,
contr'à ssu rumenzulaghju

Bianchina hè prugramata, è tù, stai pusatu !
Davant'à u spechju malatu !
porti a tarra in Catafalcu !
Sbarcani i rumenzulaghji, à l'assaltu di i piaghji,
A populu vintu, u soldu vinci !

Di l'annata novant'ottu, ognunu si ramintarà,
Di ssu locu cusi caru, ognunu s'invargugnarà !

D'avè lasciatu a ruina ind'a vaddi isulana !
Trista cundanna...pa u locu indè no semi nati !

 

Paroddi è mùsica : Antoni Tramini 1998