Dicendu chì a patria era

Mitu anticu ind'è a spema scimesca,
Di l'antichi cumbattanti di a Moresca,
Pòpulu natu ind'è nidu muntagnolu,
Paisanu fattu da machjaghjolu
Dicendu chì a Pàtria era...


Una storia nata à l'alba di i tempi,
Spada di stàntari ind'i sèculi spinti,
A salvezza di l'omu pà l'ànima affannata,
A cerca mattutina di a verità affucata
Dicendu chì a Pàtria era...


A cruciata di l'idealìsimu corsu,
Omi d'onori pà un lindumani novu,
Da Aleria à Bastèlica, si pigliava cuscenza
Di una tarra nova mughjendu spirenza
Dicendu chì a Pàtria era...


Pòpulu persu ind'è un avvena tribbulatu,
Lotta popularia, ricordu scunsumatu
Làcrimi di sangui di Maria addulurata
Di veda a so Corsica cusì matriculata.
Omu si rivolta, à fiancu ci hè Bianchina !

Dicendu ciò chì a Pàtria sarà…
Ind'a mimoria pà i nostri suldati,
Ind'i notti stòrichi si sò firmati
Purtendu u focu ardentu cù l'accènditi
Da i vostri, mai ùn sareti ghjudicati, ghjudicati

Dicendu ciò chì a Pàtria sarà...

Pà quiddi chì càmpani impiendu a sacchetta
Hè compiu quandu u celi briona "Vindetta !"
Corsica bedda, eterna assistata
Pà i "massari" ch'ani fattu a stirpata !
Corpu pienu ohimè ! semi arruinati
Dicendu ciò chì a Pàtria sarà...

Sunata di campana, o bona o gattiva
Spirenza o dolu di u pòpulu corsu
Micca matrimoniu cù l'anticu dimoniu
Paci è allegria è micca intarramentu !
A libertà ci voli à ripigliadda
A libertà ci voli à amparadda !

Dicendu ciò chì a Pàtria sarà,
Dicendu ciò chì a Pàtria sarà...

Paroddi è mùsica : A. Tramini 1995.