O lingua, sè lu sangui

O lingua, sè lu sangui di la ghjenti
Chì li dà sempri tamanta spiranza
Currendu in u filu di la storia

In tempu di guerra di quatòrdici
Ani fucilatu li paisani
Chì ùn capiscìani lu francesu

O tinti pastori dirradicati
Privi di l'aria bona di li sarri
Ammutuliti da la praputenza

Ricantu : Dundi seti à st'ora linguimozzi
L'ossa vostri sò sparti in a cianga
È la Corsica sfiata à l'abbottu

V'ani spaisatu, v'ani stirpatu
È a lingua materna priculeghja
Chì li vostri aredi sò scurdanci

Tanti forzi bughji ani dicisu
Avali di nigacci d'essa Corsi
Calcichendu l'antica tradizioni

Ricantu : A lingua hè a Pàtria carnali
U pegnu cumunu d'alta primura
Chì si spanna di leva in purleva


Senza la lingua à no tramandata
Mancu saparemu qual'è no semu
Sbanditi da li nostri patrimonia


A lingua hè l'ùltimu paramentu
U scarboncu di la menti umana
Hè lu sangui di tutti l'antinati

Parrodi : Rinatu Coti 2004.
Mùsica : Antoni Tramini 2004